Lang isches her

Wilkomme zu mim nöchste Blogg Ihtrag.

 Am 8. Juli hani min letschde Blog Ihtrag gmacht und jetzt isches scho mitte September. Wow krass wie die Ziet vergoht und es sich mega viel gloffe i dere Ziet.

Adonia Teens
Wow absolut de Hammer, mit ännere Turnee vo über 1000 KM. I han no nie so ä cools Adonia gseh und au so Professionell.

Adonia Junior
Mit ca. 60 Kind usere Favela (Armeviertel) hend mir serste Adonia Junior Camp gmacht gha. Au das isch mega speziell gsie.

I han min letschde Newsletter übers die zwei Camps gschriebe. Fals du ihn nöd bechoo hesch, denn schrieb mir äs Mail und i schicken dir noh. imikanus@gmail.com

Floorball
I bin immer no mega begeistert vo dene Lüüt vo dere Region. Sie liebed Floorball (Unihockey) und mached guet mit. Nebed de erste Frauemannschaft vo Brasilie, die erste Mannschaft vom Piaui, het jetzt au ä Schuel Unihockey in Sportunterricht ufgnoh. Somit hend mir jetzt drüü mol pro Wuche Training. Zwei mol i de Schuel und immer am Samstig morge allgemeins Training. Am Samstig psueched amigs 15-20 Persone s'training.

Reise
Min Brüder und sini Fründin hend das Joor ihri Summerferie do in Brasilie verbrocht. I han die Chance packt und bin mit ihne nochli das wunderschöne land go ahluege. Manaus, Amazonas, Jery, Barnaiba und Teresina hend mir törfe besser kenne lerne. Die Ziet isch so schnell verbii gange, dass jetzt wieder de alltag ihkert isch. Sie sind brunbrennt zrug id Schwitz gfloge.

Heiss
Momentan isches do ca. 38° im Schatte und es isch so richtig heiss. Die Temperatur macht ein so richtig schlapp. I de Sunne chunt mer sich vor wien äs Hündli am Grill, de Schweiss tropft eifach abe obwohl mer gar nüüt macht. Zum Glück hend mir äs klimatisierts Büro und so machts schaffe am Rechner au Spass.

Defekti Grät
Momentan isches krass jetzt hets scho mis dritte Grät innert drüü Wuchene glupft. Zerst mini Laptop Tastatur, das hani denn chöne löse i dem das mir min Brüäder ä neui mitbricht het, denn min Brenner und jetzt no mini Digicam. So isches spanned und i chan lerne i allne Bereiche uf Gott vertraue. Elektrischi Grät sind do in Brasilie ca. 2-3 mol so tür wie in Europa. Darum luegi das es öpper chan mitbringe.

Zum Schlus
Danke das du immer wieder min Blog lesisch und mich motiviersch zum wieterzschriebe. I versprich dir, nöchstmol gits wieder was aktuells und i halt dich ufem laufende.

Liebi grüss und gottes sege

Immanuel Knaus oder Imi