Wuhaaa Floorball für Brasilie, Piaui, Teresina

Hey
wieder ä mol isches so wiit es chunt min nöchste Blogg. Floorball oder au Unihockey gnennt isch jetzt definitiv in Teresina ahchoo.

Was heisst das:
Üsie letschde Gäst hend Unihockey Material mitbricht. Schläger, Bäll, Goali-Gsichtsmaskene, T-Shirt und was es süsch no de zue brucht. Das heisst mit chönd mit ämene neue Projekt starte. Mir möchtet die eher neu Sportart i dere Region ihführe und Teams ufbaue wo nocher selber funktionieret. Das heisst es werdet Spieler usbildet, dass sie i ihrem Quartier chönd ä Mannschaft ufbaue.

Zerst hend mir än Schueligs-DVD übersetzt und än Clip gmacht wo die Lüüt do ahspricht. Ahspricht so, dass jede wonen gluegt het grad än Schläger gholt het und isch go Spiele. Braselianer stönd eifach uf neui Sportarte oder sachene wo cool sind ;-) So chönd mir die erste erfahrige mache und luege wie sie druf reagiered. Jetzt sind mir dra, dass Floorball (internationale Name für Unihockey) au i de Schuele ahbote wird. Zerst mol i dere Schuel wo Kids vo Häberlis gönd. Häberlis hend än sehr guete Droht zu de Schuel. Adonia, Schwitzer-Braselianischi Schuel und jetzt no Floorball, sind mir mol gspannt wie sich das alles no Entwicklet. Unihockey söll als Sport i de Schuel ahbote werde. Fuessball spielt de jede und jede chas sehr guet, aber Floorball chan die Region verändere.

Vor einige Täg sind mir Fründe go psueche wo ä evangelistischi-Favela Arbet am ufbaue sind. Sie lebet meh oder weniger voll i dere Favela und hend dete ä Schuel und ä Chile ufbaue. Nebet dere Schuel hends jede Sunntig no Gottesdienst. A dem Tag wo mir dete gsie sind hends am Morge ä Tauf-Gottesdienst gah und am Nomitag no gmüätlichs zäme sitze und Adonia vorstelle. Die Situation hend mir grad gnützt zum au no Floorball vorstelle. Noch dere ganze Präsentation hend mir Goals ufgstellt und mit de Favela-Kids ahgfrange zum Spiele. Sie sind hellbegeistert gsie und gfroget wenn mir üs wieder gsehnd.
Öppe ei Wuche spöter hends do bi üs ufem Sitio än Jugendevant gamcht gha und die gliche Kids sind wieder cho. So hend mir grad churz beschlosse äs Turnier gmacht mit 4 Mannschafte a 2 Spieler. Wow es het so viel Spass gmacht gha und als Sieger sind de Dan und ich vom Platz gange. Uf dem Platz wo mir spieled isch eher än chline Platz, aber es langet bis jetzt. Ufem Bild gsehsch du die meiste Spieler vo dem chline Turnier. Und so sehen Sieger aus!!!!

Wie chunt mer eigentlich zu Goals in Brasilie?
Jo die Frog hani mir augstellt gha. Überleit wie chöntet mer das mache, Holz, Metall,... hmm me söts chöne ine Auto tue, und es sött liecht sie, well die meiste Braselianer fahred mit em Töff ume. Also Goals wo liecht, stabiel, zerlegbar, und was weiss ich süsch no mönd sie. Soviel Sachene isch mir dur de Chopf gange und es het mir kei Ruhe loh. So hani mol Gott gfroget und bin dur de Garte "Eden" gloffe. Uf eimol bliebi voremene Wasserhane stoh. Lueg das Ding gnau ah und denk das isches. Wasserleitige. Die sind liecht, me chas zämestecke und imene Sack chöntet mer die transportiere. Unterwegs zum Büro mach i mir gedanke wie die söttet usgseh. Mach mir ä Skizze und hol Masse usem Internet. Mir dere Idee bini zum Andreas gang und er seit; "guet stieg ih mir fahred zum Lade und chaufet's Material. Zerst hani mir aber no alles überleit und usgrechnet. So bald mir wieder dehei gsie sind isches losgange. Schniede, messe, korrigiere, zämedrucke,..... innert chürzi isch s'erste Goal fertig gsie. Drüberabe Nummer zwei, drüü und viel. Wow cool und jetzt macht Spiele grad no meh spass. Das du dir öppe chasch vorstelle wie so was usgseht hani dir do äs Bildli vo üsne chline Goals. Falls du au mol Intresse hesch zum so was baue denn nimm mit mir Kontakt uf und i schick dir sehr gern de Plan.

Mitte bis Ende Juli möchtet mir so was wien äs Trainings-Weekend oder sogar ä Trainingswuche dureführe. Mir sind do uf de Suechi vo braselianische Spieler. Leider sind die alli sehr wiit weg, also die meiste lebed in São Paulo. Mir söttet ihne de Flug finanziere und ein Flug isch ca. 800 Franke. S'ganze Team isch überzüügt das es meh Sinn macht, wenn Braselianer chömed. Wer chund und wie mir das finannziered isch no alles offe. I halt dich ufem laufende wies wiitergoot.

Also du gsesch do lauft immer was und es got vorwärts.
I freu mi jetzt scho zum dir bald chöne die nöchste Bilder schicke und verzelle wies so gloffe isch. Uf jede Fall isches bis jetzt scho än riese Erfolg und das isch erst de Ahfang.

Floorballerische grüäss us Brasilie

euene Blogger

Imi

Ps: Vor einige Wuchene hani min erste Newslatter verschickt, wenn du ihn nöd überchoo hesch, denn schrieb mir eifach äs Mail (imiknaus@gmail.com) und ich schicken dir.